من تخاريفى 4

استكمال لتخاريفى الغير منتهيه اتكلم النهرده فى شويه مواضيع حلوه كده

الجزء الاول من الحلقه يووه قصدى من الموضوع تحت عنوان مسأله مبدأ

طبعا مش مسأله مبدأ اللى هو المسلسل البايخ الرخم بتاع خالد النبوى اللى انا

اصلا ما شفتوش ولا حتى هشوفه ولكن زى ما بيقولو الجواب بيبان من عنوانه

خلينا فى موضوعنا هى مسأله مبدأ ولكن من نواحى اخرى

موضوع المهور وطلبات الاهل التعجيزيه لما حد يتقدم للارتباط ببنتهم

فى ناس كتير بيقول دى حاجه مش غلط لان ده حقهم ولازم يضمنو عيشه

كويسه لبنتهم ..

بصراحه اللى بيقول كده ممكن يكون ليه الحق بس فى حالات قليله

مش فى كل الاحوال بقى الاهل يعملو كده لان ناس كتير بيعملو

موضوع الشبكه والمهر وجوواز بنتهم زى التجاره اللى هيدفع اكتر

يشيل البيعه وطبعا مش مهم رأى البنت او اختيارها طبعا هما بيقولو

دا كلو عشان مصلحه البنت بس ممكن الغنى ده اللى هيشترى فيلا للبنت

وهيشترى نص كيلو دهب او حتى كيلو مع انه مش بيحصل الا نادراً

والغنى برضو اللى هيوفرلها كل حاجه ومش هيحرمها من شئ ...

ممكن يكون سبب من اسباب تعاستها فى الدنيا بسبب الفلوس

وكل الحاجات دى ولشئ تانى انه وهو بيتقدم ليها بيعتبرها

سلعه او بيعه هيشتريها بفلوسه وهيتاجر فيها ويتحكم فيها براحته

لانها بتاعته ..

وبرضو بفلوسه هيغيرها ويرميها لما يشوف واحد احسن منها

من وجهه نظره طبعاًً ..

يعنى كل مسائل ومواضيع الزواج حاليا لا تعتمد الا على الماده فقط

اصبح الاباء ماديين جداا ولا يفكرون فى اى شئ سوى من يدفع اكثر ..

فألاولى عندما يتقدم الشاب الصالح المؤمن ان يتقبلوه ويزوجوه ابنتهم

ولكن اين من يفعل هذا ذلك هذه الايام الا القليل ..

ـــــ   قصه حقيقيه من واقععنا   ـــ

شاب فى الــ 28 من العمر من عائله محترمه جداااا رجل صالح

مثقف جداا ومتخرج من افضل الجامعات ويعمل امام وخطيب  بمسجد

تقدم ليخطب بنت واتفق مع اهلها على كل شئ ولكن عندما جاء وقت الاتفاق

على الشبكه وكم هيشترى من الدهب ..

طبعا هذا الشيخ كان ينصح الناس فى خطبه وينصح الشباب بأن يخفضو

قيمه المهور والذهب وان يخففو على الشباب حتى يستطيعو الزواج

وطبعا والد البنت طلب ان تكون قيمه الشبكه والذهب كبيره

وبعد كل الاتفاق على كل شئ كان للشيخ الشاب  رأى اخر لم يتوقعه احد

قال الشيخ لوالد البنت كيف انصح الناس بخفض قيمه المهور والذهب

وادفع لبنتك قيمه كبيره وفلوس كتير كيف اعمل كدا وانا اللى بنصحهم

وربنا قال اتأمرون الناس بالبر وتنسون انفسكم كيف هذا

طبعا لا يصح ابداً هذا الكلام وطبعا الاب رفض وانتهى الموضوع

ولم يتزوجها ...

سبحان الله نعم هى مسأله مبدأ ومراقبه لله فكيف ينصح الناس ولا يفعل

ما يقول لهم ولا يعمل بما يقول

سبحان الله برضو كيف اب زى ده يعمل كده ويرفض شاب وامام مثل هذا

رجل صالح ومؤمن احسبه كذلك والكل يحسبه ولا نزكيه

يحبه كل الناس ويقوم بالنصح دائما .. ربنا يرزقه بالزوجه الصالحه

انا افتكر ان ابويا لما سمع عن الموضوع ده قالى والله دا اب غبى

انا والله لو عندى بنت ازوجها له بدون اى شئ (( طبعا عشان مش عندو )) ههههههههه

الجزء الثانى من الموضوع ش من الحلقه

ما تتعبش نفسك احنا نصوت بدالك يعنى صوتك عندنا اصلا من غير ما تيجى

واحنا داخلين على انتخابات مجلس الشعب بصراحه بحس ان الايام دى

زى ايام الاعياد يعنى فى الاعياد الاطفال الصغيره بتدور تلعب

فى الشوارع ويجرو ويلعبو مع بعض وبتبقى فى زيطه

فى الشوارع وكده وده اللى بيحصل الايام دى تلاقى العربيات

ماليه الشوارع والناس بتلف على رجلهم فى الشوارع ونفس الزيطه

ونفس احساس اللى بيحسو انهم اطفال صغيرين بس الفرق ان الرجاله

بتوع الانتخابات بيضحكو على الناس بالكلام وباقى الحاجات والاغراءات

المعروفه وبيلعبو عليهم لكن الاطفال بيلعبو لانهم عايزين يلعبو

دا غير ان الناس دى بتوع الانتخابات محدش بيشوف وشهم الا اوقات

الانتخابات كل 3 او 4 سنين بس وبعد انتهاء الانتخابات طبعا هما ربنا

يكون فى عونهم بيتعبو من المصالح الشخصيه اللى بيعملوها ومن جمع الفلوس

وقضاء حاجاتهم الشخصيه ومساعده اهاليهم وبس ربنا يعينهم

 (( يا رب تكون فكرتى وصلت ))
ثانيا بصراحه انا من النوع اللى مش بحب موضوع الانتخابات

حتى كل اللى يقولى هتصوت لمين او هتنتخب مين اقوله محدش يستاهل

صوتى او كلهم نصابين وانا مبحبش الانتخابات وكله كلام فاضى

بس بعد سماع فتاوى لفضيله المفتى نصر فريد واصل مفتى مصر سابقاً

وانا بصراحه بحب الشخص ده كتير وبحترمه جداا جدااا

وانه افتى بوجوب التصويت فى الانتخابات لانها امانه ولابد من تأديتها

مهما تكون النتايج ولازم نصوت للشخص اللى هيفيد الناس والمجتمع

ونعمل اللى علينا ونروح ندى صوتنا له وبصراحه انا اقتنعت بالموضوع ده

وهتبقى اول مره اروح انتخب حد ويمكن ربنا يسهل وربنا يوفق الكويس

ويقدم ما فيه الخير ..

اخيراً اختم بنكته

رجل راح عشان ينتخب ودخل وكتب اللى هينتخبه وخلاص علم عليه

وهو خارج قابله واحد  قاله علمت على الحزب الوطنى قاله لا قاله

 حلو انسى نفسك روحت فى داهيه يا خفيف ارجع بسرعه وغير صوتك

رجع صاحبنا لرئيس اللجنه وقاله انا عايز اغير صوتى قاله ليه

قاله اصلى ما علمتش على الحزب الوطنى واخترت غيره غصب عنى

جه قرب منه وقاله ما تخافش احنا صلحناهلك اوعى تعمل كده تانى ...

واخيرا خالص يعنى

ما لحقتش اعمل تصميم للموضوع لان الساعه دلوقتى 2.25 صباحا

وانا ورايا جامعه بكره وربنا يستر واصحى يلا ربنا يسهل..

ودمتم بوووووووود