كره القدم اليدويه

مع انى ما شفتش ماتش الاهلى والترجى لاسباب كثير منها انى مش بحب الاهلى وزملكاوى متعصب

ولانى برضو مش بحب اشوف ماتش بره البيت والماتش ده ما كانش متذاع ومش بحب اتفرج على ماتش بره بيتنا حتى لو مين بيلعب لانى ضد سياسه التشفير الهمجيه اللى بتعملها قنوات الجزيره والاذاعه والتليفزيون..

طبعا الكل شاف الماتش وشاف الاهلى وهو بيتغلب وشاف الهدف الغير صحيح للترجى بس انا ما شفتش

ومع انى متأكد صح من موضوع ان الهدف غير صحيح وان الاهلى اتظلم كالعاده عشان كده حبيت اقول رأى فى الموضوع ده..

على فكره لو ماتش العوده ده كان فى مصر والهدف ده كان للاهلى وكان برضو غير صحيح كان الحكم هيحسبو صحيح..

يعنى انا بصراحه مش عارف ايه موضوع الاتحاد الافريقى مع الفرق والمنتخبات المصريه..

حاجات كتير مش كويسه بتحصل ضدنا ومحدش بيتكلم اشمعنه احنا..

عشات يعنى بنلعب كره القدم كلعبه رياضيه اولا مش لعبه همجيه وتعصب اعمى غشيم بيحصل ضدنا

هو عشان احنا افضل منتخب فى افريقيا وفى الوطن العربى الكل بيكره كره القدم المصريه عشان كده يعنى

ولا عشان ايه مش عارف والله وظلم كبير بيحصل ضدنا سواء من الحكام او من سوء الاستقبال اللى بيحصل لما بنروح بلد فى الاصل اسمها بلد عربيه شقيقه وفى الاصل برضو ان مصر دى بلد عربيه اسلاميه..

مش عارف ليه كل ده والله ..

نرجع لموضوع الحكم حاجات غريبه بيعملوها الحكام الافارقه بحس انهم بيخافو مثلا من البلد اللى بيلعبو فيها

بس المشكله مش فيهم المشكله فى الاتحاد الافريقى النونو اللى مش بيحاسب اى بلد على سوء معامله الحكام

او البعثات الرياضيه ..

الاتحاد الافريقى اللى عدى كتير من الجرائم والكوارث ولم يحاسب من قام بها

الاتحاد الافريقى اللى لم يوفر الحمايه الكامله لبعثات الكرويه والحكام

عشان كده الحكام بيخافو يعنى الحكم ده او حتى حامل الرايه متأكد 100% انه لو لغى الهدف الجماهير ما كانتش هتسيبو وكان ممكن ما يعرف يطلع من الملعب الا ميت او يطلع على المستشفى زى كثير من الحالات اللى قبلو

بس برضو الغلط كان من الاول لما محمد فضل احرز هدف فى مباراه الذهاب بيده (( وانا طبعا كالعاده ما شفتوش )) والهدف اتحسب عادى كأن شيئاً لم يكن وبكه نقول راح زمن العدل والمساواه وخلاص كل شئ بالايد

انا من مكانى هذا من مدونتى هذه من الساعه دى اللى هموت من النعس بسبب التاخير ده اطالب بجواز احراز الاهداف بالايد وتحويل كره القدم اللى كره القدم اليدويه..

طبعا الموضوع فيه شويه حاجات فلتت منى لانى نعسااااان خالص ارجو المعذره!!

بس خلاص كفايه كده

دامت الرياضه للجميع

كُتب الساعه 1.30 صباح الاثنين اللى مش عارف تاريخه